იშვიათია წიგნი, რომელსაც ისეთი მითქმა-მოთქმა, გამოხმაურებები, კრიტიკა, ლანძღვა და ამავდროულად მოწონება მოჰყვა, როგორც ვლადიმირ ნაბოკოვის "ლოლიტას". ეს სკანდალური წიგნი, ზოგისთვის ასაკოვანი ლიტერატორის ავადმყოფური გატაცების ილუსტრაციაა, ზოგისთვის - სიყვარულის განსაკუთრებული ისტორია, ზოგიერთი კი გაცილებით ღრმად იხედება და ტირანიისა და ტოტალიტარული ეპოქის გამოძახილს, წართმეული ბავშვობის ტრაგიზმს კითხულობს... ასეა თუ ისე, ამ წიგნს არასდროს აკლდა მკითხველი და თუმცა, ვლადიმირ ნაბოკოვი, სხვა არაერთი საინტერესო და მნიშვნელოვანი წიგნის ავტორია, მაინც ყველაზე ხშირად სწორედ "ლოლიტასთან" ასოცირდება.