ივ. ჯავახიშვილის სახ. თბილისის სახელმწიფო უნივერსიტეტის ჰუმანიტარული ფაკულტეტის აღმოსავლეთმცოდნეობის ინსტიტუტის ასირიოლოგიის დეპარტამენტში წლების მანძილზე იკითხება კურსი „წინა აზიის დიპლომატია“. კურსით ინტერესდებიან არა მხოლოდ ასირიოლოგები, არამედ სხვა სპეციალობების სტუდენტებიც. ვცდილობთ გავაცნოთ მათ ძვ.წ. II ათასწლეულში შექმნილი ძველაღმოსავლური დიპლომატიური წყაროები. სამწუხაროდ, დღემდე მხოლოდ რამდენიმე ხელშეკრულების ტექსტის თარგმანი მოგვეპოვებოდა, რაც სასწავლო პროცესში გვიშლიდა ხელს. ამიტომ, მიზანშეწონილად ჩავთვალეთ, ხეთური წყაროები გვეთარგმნა ქართულად და ხელმისაწვდომი გაგვეხადა მკითხველთათვის. წიგნი გათვალისწინებულია დამხმარე სახელმძღვანელოდ თსუ ჰუმანიტარული ფაკულტეტის აღმოსავლეთმცოდნეობის ინსტიტუტის ასირიოლოგიის სასწავლო პროგრამის ძირითადი და არჩევითი კურსის ფარგლებში. ვფიქრობთ, რომ იგი დააინტერესებს არა მხოლოდ სპეციალისტებს, არამედ დიპლომატიის საკითხებით დაინტერესებულ მკითხველთა წრეს.