"ირანული თეატრი შესაძლოა გაცილებით საინტერესოა, ვიდრე მათი კინო, მაგრამ სცენის სპეციფიკიდან გამომდინარე, თეატრი ჯერჯერობით მსოფლიოში ირანული კინოსავით პოპულარული არ გამხდარა. თეატრის მაღალ დონეს, რასაკვირველია, განაპირობებს რეჟისორთა და მსახიობთა პროფესიული ოსტატობა, მაგრამ უპირველესად, ეროვნული დრამატურგია, რომელიც ამ წიგნში წარმოდგენილი ნიმუშებიდანაც გამოჩნდება, რომ უაღრესად თავისებური და საინტერესოა. წიგნში შესულია თანამედროვე ირანელი დრამატურგების – აქბარ რადის, ამირ დეჟაქამის, ყოთბ ედ-დინ სადეყის, ნაყმე სამინის, მოჰამად ჩარმშირისა და ბაჰრამ ბეიზაის საუკეთესო პიესები. სპარსულიდან თარგმნა, წინათქმა და განმარტებანი დაურთო გიორგი ლობჟანიძემ. წიგნი იბეჭდება კულტურისა და ძეგლთა დაცვის სამინისტროს მხარდაჭერით."