გიორგი სოსიაშვილი ქართველი ისტორიკოსი და მწერალი, რამდენიმე პროზაული კრებულისა და არაერთი ისტორიული მონოგრაფიის ავტორია, რომელმაც გასულ წელს, კრებულისათვის ,,ოთხი მოთხრობა“ პრემია ,,საბა“ მიიღო, ნომინაციაში - 2021 წლის საუკეთესო პროზაული კრებული. ორტომიანი რომანი - ,,გოდების კედელი“ ავტორმა კავკასიელი ხალხის საერთო პრობლემებს მიუძღვნა. რომანში წარმოდგენილ ,,ტკივილისა და რწმენის კავკასიური საგას“ მთავარი გმირი - ბაქარი მთხრობლისა და უშუალო მონაწილის ამპლუიდან მოუყვება მკითხველს და ამ, ერთი შეხედვით სადა, უბრალო ენით წარმოდგენილ თხრობაში ისე ბუნებრივად შემოიტანს ადამიანის სულიერი სამყაროს ფარული სივრცეების თვალმისაწვდომობას, მორალურ და ზნეობრივ დილემებს, ფილოსოფიურ სენტენციებსა თუ გეოპოლიტიკურ მწვავე პრობლემებს, რომ მკითხველი თავადაც ამ ვრცელი რომანის თანაპერსონაჟად იგრძნობს თავს.