"ნაპირი" ნესტან ეგეტაშვილის მოთხრობების მესამე კრებულია. "ნაპირამდე" იყო "შაქარყინული" და "სამი მოთხრობა". ამას გარდა 2016 წლიდან ავტორის მოთხრობები სისტემატურად იბეჭდება "ლიტერატურულ გაზეთში". ნესტანი არც ახალ კრებულში ღალატობს საკუთარ სტილს, ერთგვარი რომანტიზმით, მელანქოლიითა და მისტიციზმით შეფუთოს და ისე მოგვაწოდოს ამბები უიღბლო სიყვარულზე, ბავშვობის ტრავმებზე, ემიგრაციის სიმძიმეზე, დაკარგულ სამშობლოზე და ა.შ. პერსონაჟებში აუცილებლად ამოვიცნობთ საკუთარ თავს, ჩვენი ოჯახის წევრებს, მეგობრებს, ნაცნობებს. მუდმივად თან გვდევს განცდა, რომ მოთხრობებში ნაამბობი ამბები სადღაც უკვე გვსმენია, რომ ეს ყველაფერი მართლა მოხდა და რომ გვგონია, ეს-ესაა ამოვიცანით დროც და ადგილიც, ყველაფერი ხელიდან გვისხლტება და კვლავ იდუმალების ბურუსში იძირება. ნესტან ეგეტაშვილი ამასთანავე არის მკვლევარ-მეცნიერი. იკვლევს გვიანანტიკურობის ბერძნულ პოეზიას, ანტიკურ მითოლოგიასა და მედიცინას, რაც მრავალმხრივსა და კიდევ მეტად საინტერესოს ხდის მის ლიტერატურულ შემოქმედებას.