წელიწადის დროებს, თვეებს თუ დღეებს თითოეულ მათგანს თავისი საკუთარი თვისება, სხვათაგან გამორჩეული ინდივიდუალობა აქვს. ბუნება ხილული ნიშნებით გვიცხადებს თავის რიტმს. წელიწადის ყოველ დროს თავისი ნიშანი აქვს, წელიწადის წრებრუნვაში თავისი საკუთარი სახელით არის ჩაწერილი. ვინც მიყვება ქრისტიანული წელიწადის რიტმს, როგორც მთესველი და მომკალი, ის ეზიარება წარუვალ ჭეშმარიტებებს, რადგან ყოველი დღესასწაული ამ ჭეშმარიტებებით არის ბეჭედდასმული. ქრისტიანული მართლმადიდებლური სადღესასწაულო კალენდარი უმდიდრესია მსოფლიო რელიგიურ კალენდართა შორის. ჩვენ ავირჩიეთ ტრადიციული თანამიმდევრობა დღესასწაულთა, ოღონდ დავიწყეთ შობით და არა ხარებით, და მათ შესახებ გიამბობთ.