გერმანელი მწერლის, ნობელის პრემიის ლაურეატის ჰაინრიხ ბიოლის ნაწარმოები „კატარინა ბლუმის შელახული ღირსება, ანუ როგორ იბადება ძალმომრეობა და სადამდე მივყავართ მას“ 1974 წელს გამოქვეყნდა ჟურნალ „შპიგელში“ და სულ მალე ბესტსელერად იქცა. ეს არის დრამა ახალგაზრდა ქალისა, რომელიც სენსაციებს გამოკიდებულ ჟურნალისტთა მსხვერპლი ხდება: მომხიბვლელი შინამოსამსახურე კატარინა ბლუმი სრულიად შემთხვევით იქცევა სენსაციის მოყვარული გაზეთის დევნის ობიექტად. მას საკარნავალო წვეულებაზე ერთი ნახვით შეუყვარდება ელეგანტური მამაკაცი, რომელსაც პოლიცია ეძებს, როგორც რადიკალ კანონდამრღვევსა და „ბანდიტს“. საზოგადოებრივი აზრის კლანჭებში ჩავარდნილ ახალგაზრდა ქალს სხვა არაფერი დარჩენია, გარდა იმისა, რომ იარაღით დაიცვას შელახული ღირსება.