ცნობილი ირლანდიელი მწერლის ჯეიმზ ჯოისის წიგნი “დუბლინელები” წარმოადგენს საყოფაცხოვრებო თემებზე შექმნილ თხუთმეტი მოთხრობის ციკლს("დები", "ეველინი", "არაბეთი", "უბედური შემთხვევა", "ავტორბოლის შემდეგ", "მიცვალებულნი". . .). ამ მოთხრობებში ჭეშმარიტი ხელოვანის ოსტატობით არის დახატული პროვინციული ქალაქის ყოველდღიური, ერთფეროვანი ცხოვრების სურათები, პატარა ადამიანების ბედი და მათი უღიმღამო არსებობა. “მეოცე საუკუნის ადრეული წლების ირლანდიური ქალაქის ცხოვრება, ადამიანები ქალაქში – უბედურებითა და ბედნიერებით, ტკივილითა და სიხარულით, საშუალო ფენის უფერული ყოველდღიურობა და მასთან დოზირებული ადამიანური ემოციები – ეს ჯეიმს ჯოისის მოთხრობებია, სიამარტივით, დახვეწილობითა და დამახასიათებელი განწყობით შექმნილი ტექსტები.