#წერექართულად ქართული დამწერლობის პოპულარიზაციას და ენის, როგორც ეროვნული ფასეულობის დაცვასა და განვითარებას ემსახურება. იგი რამდენიმე წამოწყებას აერთიანებს, წარმოდგენილი ელ.წიგნიც ამ კამპანიის ფარგლებში შეიქმნა და მნიშვნელოვანი ქართველი ავტორების აზრებს აერთიანებს ენის როლისა და მნიშვნელობის შესახებ. თუკი რომელიმე ადამიანი ასოცირდება ქართულ ენასთან, ეს, უპირველეს ყოვლისა, იაკობ გოგებაშვილია, რომლის შედგენილმა დედაენამ, ფაქტობრივად, გადაარჩინა ქართული ენა. "ბურჯი ეროვნებისა" იაკობ გოგებაშვილის უმნიშვნელოვანესი პუბლიცისტური ნაწარმოებია, რომელიც მშობლიური ენის სწავლების მნიშვნელობასა და ენის როლს ეძღვნება.