ზუსტად ვერ მივხვდი, მაკვანეთში ჯოკრის თამაშის დროს ნაშებზე ლაპარაკს მოაყოლა თუ გამოიგონა. თუ სულაც მართლა მოხდა ეს ამბავი. ან იქნებ სულაც წარმოიდგინა, უიღბლო მხატვრის წარმოსახვა იყო, განსაკუთრებით პლანის მოწევის შემდეგ – ხელის თხოვნა ერთდროულად სამი გოგოსთვის და სამივეს ნათესავების თავმოყრა ერთ დღეს დათქმულ ერთ ქორწილში, პოტენციური საცოლეებისთვის კი მოწამლული საქორწილო კაბების გაგზავნა. იმ ქორწილში რა ამბავი ატყდებოდა, ეს ამ მოთხრობის არარსებული გაგრძელებაა. თუმცა მანამდე ამბავი სოფელში იწყება, სადაც ზაალი, ოთხი თაობით თბილისელი მხატვარი, დროებით გადასახლდება.